18 апрель куни Қашқадарё вилоятида ҳуқуқни муҳофаза қилувчи органлар томонидан ер билан боғлиқ бир нечта коррупцион схемалар фош этилди.
Ўзбекистон Давлат хавфсизлик хизмати маълумотига кўра, тезкор тадбирлар Иқтисодий жиноятларга қарши курашиш департаменти билан ҳамкорликда ўтказилган.
Қарши туманида туман кадастр агентлиги бўлими етакчи инспектори қўлга олинди. Терговга кўра, у таниш мансабдор шахслар орқали ўзбошимчалик билан эгаллаб олинган 12 сотих ер учун қўлланилган 82 миллион сўмлик жаримани бекор қилиш ҳамда ушбу ерга кадастр ҳужжатларини расмийлаштириш эвазига 2 минг АҚШ доллари талаб қилган. Шубҳланувчи пулни олаётган вақтда қўлга тушган.
Шунга ўхшаш ҳолат Шаҳрисабз туманида ҳам аниқланган. Маълум бўлишича, аввал фирибгарлик учун судланган 59 ёшли шахс туман кадастр палатаси ходими билан тил бириктириб, фермер хўжалигига тегишли бўлган 9 сотих ерни ноқонуний равишда хусусий қурилиш компанияси раҳбари номига расмийлаштириш учун 7 минг доллар талаб қилган. Улар 4 минг доллар олаётган вақтда ушланган.
Ҳар икки ҳолат юзасидан жиноят ишлари қўзғатилган. Айни пайтда тергов ҳаракатлари давом этмоқда.
