16 апрель куни Тошкент вилоятининг Ўртачирчиқ туманида жойлашган «Ўрта Овул» маҳалласидаги турар жойда портлаш содир бўлиб, ундан кейин ёнғин чиққан.
Фожиа оқибатида тўрт нафар инсон ҳалок бўлди — 30 ёшли эркак ва унинг уч нафар фарзанди. Эркакнинг турмуш ўртоғи ҳамда онаси оғир жароҳатлар билан шифохонага ётқизилган.
Гувоҳларнинг айтишича, тунги вақтда кучли портлаш овози эшитилган, шундан сўнг ёнғин бошланган. Атрофдаги уйлар аҳолиси шошилинч тарзда хонадонларини тарк этган. Қўшниларнинг таъкидлашича, эркак оиласини қутқаришга ҳаракат қилган: у хотини ва онасини дераза орқали чиқаришга муваффақ бўлган, аммо болаларини қутқаришга уриниш вақтида ҳалок бўлган.
Ҳодиса сабаблари ҳозирча аниқланмаган. Воқеа жойида тезкор хизматлар иш олиб бормоқда, текширув ишлари давом этмоқда.
