Тошкент шаҳрида 6 апрель куни «Инсон ҳуқуқларига асосланган ёндашув: иқтисодий, ижтимоий ва маданий ҳуқуқлар ҳамда соғлом атроф-муҳит ҳуқуқини бюджетлаштириш» мавзусида уч кунлик семинар ўз ишини бошлади. У Ўзбекистон Республикаси Инсон ҳуқуқлари бўйича Миллий маркази томонидан БМТ Инсон ҳуқуқлари бўйича Олий комиссари бошқармасининг Марказий Осиё бўйича минтақавий бўлими билан ҳамкорликда, Ўзбекистон Республикаси Иқтисодиёт ва молия вазирлиги иштирокида ташкил этилди.
Тадбирда 20 дан ортиқ вазирлик ва идоралар вакиллари, жумладан Иқтисодиёт ва молия вазирлиги, Адлия вазирлиги, Соғлиқни сақлаш вазирлиги, Мактабгача ва мактаб таълими вазирлиги, Миллий ижтимоий ҳимоя агентлиги, Экология ва иқлим ўзгариши бўйича миллий қўмита, шунингдек Ҳуқуқни муҳофаза қилиш академияси вакиллари иштирок этмоқда.
Семинарни очар экан, Ўзбекистон Республикаси Инсон ҳуқуқлари бўйича Миллий маркази директори Акмал Саидов замонавий шароитда бюджет сиёсати инсон ҳуқуқларини амалга оширишнинг муҳим воситаларидан бири эканини таъкидлади.
Унинг сўзларига кўра, «айнан бюджет орқали давлат сиёсатда инсон ҳуқуқларининг қай даражада устувор экани намоён бўлади ва уларнинг амалий таъминланишига эришилади».
Ўзбекистон Республикаси Иқтисодиёт ва молия вазири ўринбосари Гулнора Раҳимова мамлакатда давлат молиясини бошқариш соҳасида амалга оширилаётган ислоҳотлар бюджет харажатларининг самарадорлиги ва манзиллилигини оширишга қаратилганини қайд этди.
Шу муносабат билан Ўзбекистон Республикаси Президенти Шавкат Мирзиёевнинг «Ташаббускор бюджет» (Open Budget) ташаббусининг аҳамияти алоҳида таъкидланди. У бюджет маблағларини тақсимлаш жараёнида фуқаролар иштирокини кенгайтириш, давлат молиясининг шаффофлиги ва ҳисобдорлигини ошириш, шунингдек ижтимоий-иқтисодий ривожланиш устувор йўналишларини белгилашда аҳоли эҳтиёжларини тўлиқроқ ҳисобга олишнинг самарали механизмига айланди.
Тадбирга экспертлик кўмагини БМТ Инсон ҳуқуқлари бўйича Олий комиссари бошқармаси мутахассиси Игорь Гришко кўрсатмоқда. У инсон ҳуқуқлари нуқтаи назаридан бюджет сиёсатини таҳлил қилишнинг замонавий методологияларини тақдим этди.
У таъкидлаганидек, «инсон ҳуқуқларига асосланган бюджет давлатларга ўз қарорларининг тенгсизлик даражаси ва фуқароларнинг асосий хизматларга кириш имкониятига таъсирини аниқроқ баҳолаш, шунингдек бюджет жараёнининг шаффофлиги ва ҳисобдорлигини ошириш имконини беради».
Семинар дастури иқтисодий, ижтимоий ва маданий ҳуқуқлар соҳасидаги халқаро стандартлар, уларни мониторинг қилиш механизмлари, бюджет цикли ва жамоатчилик иштирокини, шунингдек бюджет даромадлари ва харажатларини инсон ҳуқуқлари нуқтаи назаридан таҳлил қилишнинг амалий воситаларини қамраб олади.
Семинар якунлари бўйича инсон ҳуқуқларини Ўзбекистон Республикасининг бюджет ва ижтимоий-иқтисодий сиёсатига янада чуқур интеграция қилишга қаратилган амалий тавсиялар ишлаб чиқилиши режалаштирилмоқда.
Ўзбекистон Республикаси Инсон ҳуқуқлари бўйича Миллий маркази матбуот хизмати.
