Тошкент шаҳри Чилонзор туман суди лицензия ва тегишли малакасиз ҳолда юз соҳасида ноқонуний пластик операциялар ўтказган эр-хотинни айбдор деб топди. Ахборот дастури Hudud хабар беришича, операциялар антисанитария шароитида амалга оширилган.
Тергов давомида маълум бўлишича, кесиш ишларини бажарган эркакда соҳага оид маълумот бўлмаган ва у операция пайтида алкоголь таъсири остида бўлган. Беморлардан бири тунги операциядан сўнг беш кун давомида комада ётган, унда оғир яллиғланиш, ириқлаш ва неврологик асоратлар ривожланган. Мустақил пластик жарроҳлар таъкидлашича, жароҳатлар арзон иплар билан тикилган бўлиб, инфекция янада тарқалган тақдирда оқибат ўлим билан якунланиши мумкин эди. Аёлнинг юзини тиклаш учун қайта операция ўтказиш талаб этилади.
Айбланувчи аёл Москвада ўқишдан ўтганини айтган, бироқ у рус тилини билмайди, тақдим этилган диплом эса шубҳа уйғотган. Шунингдек, у бир неча бор исм ва фамилиясини ўзгартирган ҳамда арзон хизмат нархлари билан қизиққан хорижий мижозларни ҳам қабул қилишни давом эттирган.
Суд эркакни Жиноят кодексининг 186-моддаси 2-қисми «б, в, г» бандлари (хавфсизлик талабларига жавоб бермайдиган хизматлар кўрсатиш) бўйича айбдор деб топиб, уни 3 йил муддатга озодликдан маҳрум этиш жазосига ҳукм қилди. Аёлга эса 3 йил муддатга озодликни чеклаш жазоси тайинланди.
