Meta Platforms компанияси АҚШнинг марказий ҳудудларида жойлашган Vistra компаниясига қарашли учта атом электр станциясидан электр энергияси харид қилиш бўйича 20 йиллик келишувларга эришганини маълум қилди. Шунингдек, компания кичик модулли реакторлар қуришни режалаштираётган икки компания билан қўшма лойиҳаларни ривожлантиришда иштирок этади.
Келишувлар ҳақидаги хабар ортидан Oklo компанияси акциялари қарийб 20 фоизга ошган, Vistra акциялари эса бозор очилиши олдидан тахминан 8 фоизга кўтарилган.
Meta маълум қилишича, компания Оҳайо штатидаги Perry ва Davis-Besse атом электр станциялари, шунингдек, Пенсилвания штатидаги Beaver Valley станциясидан электр энергияси сотиб олади. Ушбу келишувлар Оҳайодаги объектларни кенгайтиришни молиялаштиришга ва атом станцияларининг ишлаш муддатини узайтиришга хизмат қилади. Айни пайтда ушбу станциялар камида 2036 йилгача, Beaver Valley станциясидаги икки реактордан бири эса 2047 йилгача лицензияга эга.
Компания, шунингдек, миллиардер Билл Гейтс томонидан қўллаб-қувватланаётган TerraPower ва Oklo компаниялари билан кичик модулли реакторлар лойиҳаларини ишлаб чиқишда иштирок этади. Meta’нинг таъкидлашича, бу ҳамкорлик АҚШда атом энергетикасининг янги авлодини жорий этишни тезлаштиради.
Meta’нинг глобал масалалар бўйича директори Жоэл Капланнинг айтишича, ушбу келишувлар ва ўтган йили Constellation компанияси билан Иллинойсдаги атом реакторини 20 йил давомида ишлатиш бўйича тузилган шартнома Meta’ни АҚШ тарихида атом энергиясининг энг йирик корпоратив харидорларидан бирига айлантиради.
Маълумотларга кўра, мазкур келишувлар 2035 йилга қадар Meta’ни 6,6 гигаваттгача атом электр энергияси билан таъминлайди. Қиёс учун, одатда битта атом электр станциясининг қуввати тахминан 1 гигаваттни ташкил этади.
TerraPower билан ҳамкорлик доирасида 2032-йилгача қуввати 690 мегаватт бўлган икки реакторни ишга тушириш режалаштирилган. Шунингдек, Meta 2035 йилга қадар яна олтита TerraPower реакторидан энергия олиш ҳуқуқига эга бўлади. Oklo билан шериклик эса Оҳайо штатда 2030-йилга қадар 1,2 гигаваттгача энергия ишлаб чиқаришни кўзда тутади.
Big Tech компаниялари, жумладан Meta, сунъий интеллект ва дата-марказлар фаолияти ортиши туфайли АҚШда сўнгги икки ўн йил ичида илк бор кескин ошган электр энергияси талабини узоқ муддатли манбалар орқали қоплашга интилмоқда.
