ОТМларнинг бакалавриат таълим йўналишларига ўқишга кириш учун онлайн рўйхатдан ўтган абитуриентлар сони 1 миллион 18 минг 7 нафарни ташкил этмоқда. 2023-2024 ўқув йили учун олий таълим муассасаларининг бакалавриатига қабул қилиш бўйича тест синовлари катта сиғимли биноларда ўтказилади.
Энди абитуриентлар олдида имтиҳон топшириш вазифаси турибди. Тест жараёнида улардан белгиланган тартиб-қоидаларга риоя қилишлари талаб этилади.
Абитуриентлар қайси ҳолларда тест синовларидан четлаштирилиши мумкин?
Мутахассислар томонидан тақдим этилган маълумотларга кўра, абитуриент имтиҳонга микрокалькулятор, луғат, китоб, жадвал, компьютер, уяли телефон, шпаргалкалар, телекоммуникация қурилмалари ва бошқа воситаларни олиб киришга ҳаракат қилса, улардан фойдаланса, тест материалларини бошқа абитуриентга узатса, уларга ёрдам берса, бир-бири билан гаплашса, тест материалларини бинодан ташқарига олиб чиқса, тест топшириқлари китоби варағини йиртса, имтиҳон вақти тугаганда тест материалларини топширишдан бош тортса ҳамда абитуриентларнинг тегишли тартиб-қоидага амал қилмагани видеокузатувлар орқали аниқланса, улар тест синовлари жараёнидан четлаштирилади ва натижалари чиқарилмаслигига асос бўлади.
Шунингдек, абитуриент томонидан топширилган ҳужжатларнинг қалбакилиги аниқланса, у ҳолда абитуриент кириш имтиҳонларидан ёки абитуриент талабаликка қабул қилинган бўлса, олий таълим муассасаси талабалари сафидан четлаштирилади ҳамда ҳужжатлари белгиланган тартибда ҳуқуқни муҳофаза қилиш органларига юборилади.
