Олимлар сайёрамизнинг қайси минтақасида исиш энг тез содир бўлаётганини аниқлашди. Бу Европа эканлиги маълум бўлди.
2022 йилда Европада саноатдан олдинги даврга нисбатан 2,3 даража иссиқ бўлган. 2022 йил бир қатор мамлакатлар: Франция, Германия, Италия, Португалия, Испания ва Буюк Британия учун рекорд даражадаги иссиқ йил бўлди.
1980-йиллардан бери Европадаги исиш даражаси глобал кўрсаткичдан икки баравар кўп. Олимларнинг фикрича, XIX аср ўрталаридан буён сайёрада ўртача ҳарорат 1,2 даражага ошган. Иссиқлик экстремал об-ҳаво ҳодисаларини келтириб чиқаради: анормал иссиқлик тўлқинлари, қурғоқчилик ва бўронлар. Климатологларнинг таъкидлашича, ҳарорат қанча юқори бўлса, улар шунчалик жиддий тус олади.
Айни пайтда табиий офатлардан қашшоқ давлатлар кўпроқ жабр кўрмоқда. Аммо уларнинг оқибатлари бутун дунёда, жумладан, Шимолий ярим шарнинг минтақаларида ва қутблар атрофида янада оғирлашмоқда. Масалан, Европада юқори ҳарорат қурғоқчиликни кучайтирди ва кучли ўрмон ёнғинларини келтириб чиқарди. Иқлим ўзгариши бўйича “Коперник” агентлиги ҳисоботига кўра, жазирама тўлқини туфайли 16 минг киши ҳаётдан кўз юмди ва экстремал об-ҳаво 2 миллиард доллар моддий зарар келтирди.
2022 йилда Альп тоғларида музликлар рекорд даражада қисқарди. Атлантика океани шимолий қисмида сув юзасининг ўртача ҳарорати кузатувлар тарихидаги энг юқори даражага етди, Ўрта ер денгизи шарқий қисми, Болтиқ ва Қора денгизда ҳамда жанубий Арктикада исиш даражаси дунё бўйича ўртача кўрсаткичдан уч баравар юқори бўлди.
Европа қитъасининг аксарият қисмида ёғингарчилик меъёрдагидан паст бўлди. Ўтган йили қуёш нурланишининг сўнгги 40 йил ичидаги энг юқори даражаси қайд этилди, деб хабар беради mir24.tv.
