Арзимаган пул учун касб этикасини бузган ходим неча йилга қамалиши мумкин? Прокуратура департаменти Сирдарёда газ таъминоти бўлимининг таъмирлаш хизмати бошлиғи ушланганини маълум қилди.
Қайд этилишича, ДХХнинг Сирдарё тумани бўлими ходимлари билан биргаликда тезкор тадбир ўтказилган. Унда бир фуқаро ижарага олган уйида газ тармоғига ноқонуний уланиб олгани аниқланган. Ҳуқуқбузар бу иши оқибатида давлатга 6,3 млн сўм зарар етказган. Бунинг учун унга тегишли далолатнома тузилган.
«Сирдарётумангаз» газ таъминоти бўлимининг таъмирлаш хизмати бошлиғи эса ҳуқуқбузарнинг ушбу далолатномасини йўқ қилиб беришни ваъда қилган. «Бошлиқ» «меҳнати» эвазига фуқародан 1 млн сўм олган вақтида ашёвий далиллар билан ушланган.
Мазкур ҳолат юзасидан туман газ таъминоти бўлими бошлиғига Жиноят кодексининг 168-моддаси (фирибгарлик) билан жиноят иши қўзғатилиб, тергов ҳаракатлари ўтказилмоқда.
Энди у ушбу моддада белгиланганидек, 30 млн сўмгача жарима ёки 2 йилгача ахлоқ тузатиш ишлари ёки 3 йилгача озодликни чеклаш ёхуд 3 йилгача озодликдан маҳрум қилиш билан жазоланади.
