Канаданинг Альберта Университети тадқиқотчилари Сомали ҳудудида топилган 15 тонналик метеоритда аввал Ер юзида учрамаган камида иккита минерални аниқлади.
Минераллар метеоритнинг 70 граммлик бўлагидан топилиб, тадқиқот учун Канадага жўнатилган. Учинчи минерал ҳам топилиши мумкин, дейилади университет тарқатган хабарномада.
Янги минералларга элалиит ва элкинстантонит, деб ном берилди. Метеоритнинг келажаги ҳозирча номаълум бўлиб турибди. Альберта Университети Ер ҳақидаги фанлар кафедраси профессори Крис Херднинг маълум қилишича, сўнгги олинган маълумотларга кўра, метеорит салоҳиятли харидор топиш мақсадида Хитойга олиб келинган. Ҳозирча, осмон жисмининг намунасидан илмий мақсадларда фойдаланиш мумкинлиги номаълумлигича қолмоқда.
Мазкур «Эль-Али» метеорити дунёдаги энг йирик метеоритлар орасида тўққизинчи ўринда туради. У 2020 йилда Сомалида топилган эди. Guardian газетасининг ёзишича, маҳаллий аҳоли ушбу метеорит қадимдан мавжуд экани, маҳаллий аҳолининг қўшиқлари ва шеърларида тилга олинганини таъкидлашади.
