- Advertisement -
Олмалиқ кон-металлургия комбинатининг 3-мис бойитиш фабрикасида 2026 йил 16 мартдан 4 ноябргача 10 миллион тонна маъдан қайта ишланди. Бу ҳақда комбинат Ахборот хизмати хабар берди.
Шу даврда Мис эритиш заводига 160 минг тоннадан ортиқ мис концентрати етказиб берилган.
Президент Шавкат Мирзиёев 16 март куни ишга туширган фабрика «Ёшлик I» конини ўзлаштириш лойиҳасининг асосий объектларидан бири ҳисобланади. Унинг лойиҳавий қуввати йилига 60 миллион тонна маъданни қайта ишлаш ва қарийб 900 минг тонна мис концентрати ишлаб чиқаришга мўлжалланган.
Ҳозирда фабрикадаги 12 та тегирмондан 10 таси фойдаланишга топширилган. Қолган иккитасида созлаш ва синов ишлари давом этмоқда. Корхонани босқичма-босқич лойиҳавий қувватга олиб чиқиш режалаштирилган.
