Ўзбекистонлик гроссмейстер Жавоҳир Синдаров 27–29 октябрь кунлари АҚШнинг Сент-Луис шаҳрида ўтказилган Clutch Chess: Champions Showdown 2026 халқаро турнирида биринчи ўринни эгаллади.
Мусобақада жаҳоннинг тўрт нафар кучли шахматчиси — Жавоҳир Синдаров, Хикару Накамура, Фабиано Каруана ва Рамешбабу Прагнанандха иштирок этди.
Турнирнинг сўнгги ўйин куни олдидан Ўзбекистон вакили пешқадамдан 2,5 очко ортда эди. Бироқ ҳал қилувчи партияларда Синдаров вазиятни ўзгартириб, мусобақани биринчи ўринда якунлади. У сўнгги олти партиянинг учтасида ғалаба қозониб, учтасида дуранг ўйнади.
Турнир якунига кўра, Жавоҳир Синдаров 20,5 очко тўплади. Иккинчи ўринни 19 очко билан Рамешбабу Прагнанандха, учинчи ўринни 16,5 очко билан Фабиано Каруана эгаллади. Хикару Накамура эса 12 очко билан тўртинчи бўлди.
Мусобақанинг умумий мукофот жамғармаси 425 минг долларни ташкил этди. Ўзбекистонлик гроссмейстер қўшимча бонусларни ҳисобга олган ҳолда ғалаба учун 168 минг доллар мукофот олди.
Қайд этиш жоиз, Clutch Chess: Champions Showdown 2026 Жавоҳир Синдаров учун амалдаги жаҳон чемпиони Доммаражу Гукешга қарши бўлажак жаҳон чемпионлиги матчи олдидан сўнгги мусобақа бўлди.
Матчнинг биринчи партияси 24 ноябрь куни Женевада ўтказилиши режалаштирилган. Шу тариқа, АҚШдаги ғалаба ўзбекистонлик шахматчи учун асосий беллашув арафасида муҳим натижа бўлди.
