Мирзо Улуғбек тумани ҳокимлиги матбуот хизмати EFFECT.UZ ахборот агентлиги томонидан «OLIMP» қурилиш лойиҳаси юзасидан эълон қилинган хабар ва видеомурожаат бўйича расмий ахборот берди.
Маълум қилинишича, «Олтинтепа» маҳалласида жойлашган ушбу объект билан боғлиқ ҳолатлар ва «ERNEST-HOLDING» МЧЖ фаолияти ҳозирда Бош прокуратура ҳамда ҳуқуқни муҳофаза қилувчи органлар томонидан ўрганилмоқда.
Ҳокимлик вакилларининг таъкидлашича, фуқароларнинг хавотирлари ўринли деб баҳоланиб, туман ҳокимлиги ҳузуридаги махсус штаб ўз фаолиятини давом эттирмоқда. Штаб доирасида таъсисчи ва пудратчи ташкилот вакиллари билан учрашувлар ўтказилиб, қурилиш харажатлари ҳамда молиявий маблағлар таҳлил қилинмоқда. Шу билан бирга, тергов ва суд жараёнлари ҳокимлик ваколатига кирмаслиги, якуний қарорлар ваколатли органлар томонидан қабул қилиниши билдирилди. Туман ҳокими томонидан қурилишни жадаллаштириш ва муаммоларни бартараф этиш бўйича тегишли топшириқлар берилган бўлиб, жараён назоратга олинган.
