2026 йил 15–16 октябрь кунлари Тошкентда Санкт-Петербурглик ёзувчи Кристина Кретова ва тошкентлик рассом Зилола Ҳамидова ҳамкорлигида яратилган болалар китобига бағишланган тадбирлар ўтказилади. Муаллиф ва иллюстратор китобни ўқувчиларга тақдим этади, шунингдек, адабий қаҳрамонлар учун мўлжалланган кўча уйчасининг очилиш маросимида иштирок этади.
«Ўзбекистонда Недо сичқончанинг саргузаштлари» китоби Ўзбекистон Бош консулхонаси ташаббуси билан нашр этилган ва аввал Россияда тақдим қилинган. Ушбу лойиҳа Россия ва Ўзбекистон ўртасидаги ижодий ҳамкорлик намунаси бўлиб, китоб орқали болаларни мамлакатимизнинг маданияти, табиати ва тарихий мероси билан таништириш мақсад қилинган.
25 дан ортиқ китоб муаллифи бўлган Кристина Кретова ижодининг асосий йўналишларидан бири — географик эртаклар. Уларда қаҳрамонларнинг саргузаштлари орқали ёш ўқувчилар дунё ҳақида янги маълумотларга эга бўлади. Унинг китобларидаги Недо сичқонча кутубхонада яшайди, китоб ўқишни ва саёҳат қилишни яхши кўради. Янги асарда у Санкт-Петербургдан Ўзбекистонга йўл олади.
Недо Ўзбекистонда янги дўстлар орттиради ва Буюк ипак йўли бўйлаб саёҳат қилади. У билан бирга болалар Самарқанд, Бухоро ва Хива шаҳарлари, миллий урф-одатлар ва таомлар, мамлакатнинг ҳайвонот ҳамда ўсимликлар дунёси билан танишади. Асарда табиатни асраш ва Орол денгизини сақлаб қолиш мавзуларига ҳам алоҳида эътибор қаратилган.
Китоб интерактив саёҳат шаклида яратилган бўлиб, ундаги ҳикоя харита, маълумотлар, саволлар ва топшириқлар билан тўлдирилган. Асар қаҳрамонларидан бирига Тошкентда яшовчи бола прототип бўлган. Иллюстрацияларда эса тақдимотлардан бири ўтадиган китоб дўкони каби ҳақиқий жойлар ҳам акс эттирилган.
Кристина Кретованинг айтишича, китоб ғояси унинг Ўзбекистонга бўлган шахсий қизиқиши ва рус ўқувчиларини мамлакатимиз билан таништириш истагидан келиб чиққан. Маҳаллий рассом билан ҳамкорлик эса асарнинг муҳим қисмига айланган.
«Бу китобнинг ўзига хослиги шундаки, у рус ёзувчиси ва ўзбек иллюстратори ҳамкорлигида яратилган. Бу — биргаликдаги ижод маҳсули», — дейди ёзувчи.
15 октябрь куни Кристина Кретова ва Зилола Ҳамидова Алишер Навоий номидаги Ўзбекистон Миллий кутубхонасида китоб тақдимотини ўтказади.
16 октябрь куни эса лойиҳа шаҳар муҳитида давом этади. Ислом цивилизацияси маркази қаршисида уста Диёр Назиров томонидан яратилган «Ўзбекистон ва Ипак йўлининг рамзлари ва кулолчилик мактаблари» мурали очилади. Унда миллий кулолчилик мактаблари рамзлари акс эттирилиб, мамлакатнинг ҳунармандчилик мероси ва Ипак йўли давлатлари билан тарихий алоқалари ёритилган.
Мурал ёнида Зилола Ҳамидова томонидан тайёрланган китоб қаҳрамонлари уйчаси ҳам ўрнатилади. Ташриф буюрувчилар уйча эшигини очиб, ичидаги кичик кутубхонаси бўлган Недо сичқончанинг миниатюра оламини кўришлари мумкин. Кристина Кретова ва Зилола Ҳамидова уйчанинг очилиш маросимида иштирок этиб, қизил лентани қирқади.
Лойиҳа болалар адабиёти, тасвирий санъат ва маданий меросни бирлаштиради. Россиялик ўқувчилар учун китоб Ўзбекистон билан танишиш имконини берса, ўзбекистонлик болаларга таниш шаҳарлар ва анъаналарни саргузашт ҳикояси орқали янгича кашф этишга ёрдам беради. Икки мамлакат вакилларининг ҳамкорлиги болаларда китобхонликка қизиқиш, бошқа маданиятларга ҳурмат ва атроф-муҳитга эҳтиёткор муносабатни ривожлантиришга хизмат қилади.
Оммавий ахборот воситалари вакиллари учун дастур
15 октябрь, соат 12:00 — Кристина Кретова ва Зилола Ҳамидова билан учрашув ҳамда китоб тақдимоти. Манзил: Алишер Навоий номидаги Ўзбекистон Миллий кутубхонаси, 5-қаватдаги конференция зали.
16 октябрь, соат 15:30 — меҳмонларни кутиб олиш; соат 16:00 — мурал ва китоб қаҳрамонлари уйчасининг тантанали очилиши; соат 16:30 — Тахмина Маҳмудованинг Ўзбекистон кулолчилик мактаблари тарихи ҳақида қисқа экскурсия-маърузаси.
Манзил: Тошкент шаҳри, Зарқайнар кўчаси, 79-уй, EAST & WEST бутиги ёнидаги ҳовли, Ислом цивилизацияси маркази қаршисида.
Тадбирларни ёритиш учун оммавий ахборот воситалари вакиллари таклиф этилади.
