Ўзбекистон Республикаси Президенти томонидан қабул қилинган тегишли қарорга (ПҚ–368-сон, 12.10.2026 й.) мувофиқ, мамлакатда транспорт-логистика тизимини янада ривожлантириш ва бизнес учун қўшимча енгилликлар яратиш бўйича бир қатор имтиёзлар белгиланди. Хусусан, 2026 йил 1 ноябрдан эътиборан халқаро курьерлик жўнатмаларини божхона расмийлаштирувидан ўтказганлик учун амалдаги божхона йиғими ставкаси 20 фоизга қисқартирилади.
Шунингдек, ҳужжатга кўра, муайян талабларга жавоб берадиган ва «E-логистика» платформасида юқори рейтингга эга транспорт-логистика марказлари 2040 йилгача ер ва мол-мулк солиқларидан тўлиқ озод этилади. Бундан ташқари, М2, М3 ва Н тоифасидаги транспорт воситаларини ишлаб чиқарувчи корхоналарга 2027 йил охиригача мамлакатда чиқарилмайдиган компонентларни божхона божисиз импорт қилишга рухсат берилди. Транспорт-логистика марказлари реестрига киритилган объектлар учун эса 2029 йил 1 августгача махсус омборхона ва юк ортиш-тушириш техникалари, агрегатлар ва эҳтиёт қисмлар божхона божи ҳамда мажбурий сертификатлашдан озод қилинади.
