Тошкентнинг айрим ҳудудларида йирик сув тармоқларида профилактика ва таъмирлаш ишлари олиб борилиши муносабати билан ичимлик суви таъминоти вақтинча чекланади. Ишлар 14 сентябрдан 22 октябрга қадар босқичма-босқич амалга оширилади.
«Тошкент шаҳар сув таъминоти» АЖ шаҳар аҳолисини режалаштирилган сув ўчиришлар ҳақида огоҳлантирди. Мазкур ишлар сув таъминоти тизимини куз-қиш мавсумига тайёрлаш доирасида амалга оширилади.
Таъмирлаш ишлари давомида айрим ҳудудларда сув таъминоти тўлиқ тўхтатилиши ёки сув босими пасайтирилиши мумкин.
Биринчи босқич Юнусобод туманида 14 сентябрь соат 09:00 дан 15 сентябрь соат 09:00 гача ўтказилади.
Шундан сўнг чекловлар босқичма-босқич Яшнобод, Мирзо Улуғбек, Миробод, Сергели, Янгиҳаёт ва Яккасарой туманларига таъсир қилади.
Кейинги босқичда ишлар Чилонзор, Шайхонтоҳур, Учтепа ва Олмазор туманларида давом эттирилади.
Сув таъминотидаги чекловларнинг давомийлиги муайян ҳудудга боғлиқ бўлади. Айрим жойларда сув қарийб бир сутка бўлмаслиги, бошқа ҳудудларда эса чекловлар узоқроқ давом этиши мумкин.
Аҳолига сув ўчирилиши жадвали билан олдиндан танишиш ва зарур миқдорда сув захира қилиш тавсия этилган.
