Хитойда мансабдор шахсларнинг экологик зарар учун жавобгарлигини кучайтиришга қаратилган янги тартиб жорий этилди.
Унга кўра, амалдорлар хизмат вазифасини бажариш даврида йўл қўйган экологик қонунбузарликлари учун лавозимидан кетганидан кейин ҳам жавобгарликка тортилиши мумкин.
Бу тартиб мансабдор бошқа лавозимга ўтказилган, юқори лавозимга тайинланган, ишдан бўшаган ёки пенсияга чиққан ҳолатларга ҳам татбиқ этилади.
Жавобгарлик экологик талабларни бузган ҳолда лойиҳаларни маъқуллаш, атроф-муҳитни ифлослантираётган корхоналар устидан назоратни лозим даражада олиб бормаслик, йирик экологик ҳодисаларга етарлича чора кўрмаслик каби ҳолатлар учун белгиланиши мумкин.
Шунингдек, яшил иқтисодиётни ривожлантириш бўйича белгиланган вазифаларнинг бажарилмаслиги ҳам жавобгарликка асос бўлади.
Янги тартиб Хитойда давлат хизматчиларининг фаолиятини баҳолашда иқтисодий ўсиш билан бир қаторда экологик барқарорлик ва атроф-муҳитни муҳофаза қилиш мезонларига эътибор кучайтирилаётганини кўрсатади.
