Президент Шавкат Мирзиёев кичик ва микроэлектр станциялари тармоғини янада ривожлантириш бўйича таклифлар билан танишди.
Дастур доирасида хусусий сектор иштирокида умумий қуввати 164 МВт бўлган қарийб 3 мингта кичик ва микроГЭС қуриш режалаштирилмоқда. Ҳозирга қадар қуввати 41,6 МВт бўлган 64 та объект ишга туширилган. Шу билан бирга, 932 та лойиҳа бўйича ташаббускорлар аниқланган.
Лойиҳаларни жадаллаштириш мақсадида аукционларда электр энергиясини харид қилишнинг энг кам тарифини станция қувватидан келиб чиққан ҳолда белгилаш таклиф этилди. Бу инвесторлар учун янада аниқ ва барқарор шароит яратиши ҳамда «нол» нархда ютиб олинган, аммо амалга оширилмай қолган лойиҳаларнинг олдини олиши кутилмоқда.
Қуввати 100 кВтгача бўлган микроГЭСларни лойиҳалаш ва қуриш соддалаштирилган тартибда амалга оширилади. Қуввати 50 кВтгача бўлган объектлар учун шаҳарсозлик ҳужжатларини экспертизадан ўтказиш ҳамда давлат архитектура-қурилиш назоратини бекор қилиш режалаштирилмоқда.
Шунингдек, лойиҳаларни амалга оширишнинг барча босқичларини — майдон танлашдан станцияни ишга тушириш ва эксплуатация қилишгача қамраб оладиган ягона рақамли платформа яратилади.
Импортга қарамликни камайтиришга ҳам алоҳида эътибор қаратилади. Ҳозир кичик ва микроГЭСлар учун гидроагрегатлар ҳамда бутловчи қисмларнинг қарийб 90 фоизи импорт қилинади. Мамлакатда ишлаб чиқаришни маҳаллийлаштириш мумкин бўлган ускуналар рўйхати шакллантирилади.
2030 йилгача кичик ва микроГЭСларнинг умумий қувватини 204,8 МВтга етказиш режалаштирилган. Йилига 620 млн кВт·соат экологик тоза электр энергияси ишлаб чиқарилиши кутилмоқда.
Бу орқали қарийб 350 мингта хонадонни «яшил» энергия билан таъминлаш ва ҳар йили 187 млн куб метр табиий газни тежаш мумкин бўлади.
Тақдимот якунида Шавкат Мирзиёев лойиҳаларни амалга оширишни жадаллаштириш, хусусий инвестицияларни кенг жалб қилиш, ускуналар ишлаб чиқаришни маҳаллийлаштириш ҳамда соҳа учун мутахассислар тайёрлашни кучайтириш бўйича топшириқлар берди.
