Ўзбекистонда миллий сертификатга эга абитуриентларга балл ҳисоблашнинг амалдаги механизми қайта кўриб чиқилиши мумкин. Бу ҳақда Олий таълим, фан ва инновациялар вазири ўринбосари Сардор Ражабов маълум қилди.
Унинг сўзларига кўра, ҳозирда мазкур механизм қайта кўриб чиқилмоқда. Келгусида миллий сертификатга эга бўлиш абитуриентга олий таълимга киришда автоматик равишда максимал балл олишни кафолатламаслиги мумкин.
Ўзгаришларга сертификатга эга абитуриентлар сони ортиб бораётгани сабаб сифатида кўрсатилмоқда. Айрим таълим йўналишларида сертификат эгаларига максимал балл ҳисобланиши натижасида бошқа абитуриентлар учун бўш ўринлар сони тобора камаймоқда.
Олий таълим, фан ва инновациялар вазирлигида таъкидланишича, миллий сертификатга эга абитуриентлар сони йилдан-йилга ортиб бормоқда. Шу боис амалдаги тартибни янги вазиятга мослаштириш режалаштирилмоқда.
Шу билан бирга, янги қоидалар ва уларни жорий этиш муддатлари ҳозирча эълон қилинмаган.
