Илон Маскнинг SpaceX компаниясига тегишли ракета бўлаги бугун соатига тахминан 8700 километр тезликда Ой юзасига урилиб тушди. Бу ҳақда BBC’га таяниб NUR.KZ хабар берди.
Маълум қилинишича, SpaceX ракетасининг бўлаги коинотда 18 ойдан ортиқ вақт парвоз қилганидан сўнг Ойга қулаган. Ушбу жараённи дунё ОАВлари ва олимлар жонли эфирда кузатиб борди.
Олимлар маълумотига кўра, объект секундига тахминан 2,43 километр, яъни соатига 8700 километр тезликда ҳаракатланган.
«Ойга қулаган Falcon 9 ракетасининг эҳтимолий қисми — бу Ерга қўниш учун қайтарилмайдиган юқори босқич бўлиб, унинг ўлчами тахминан беш қаватли бино билан тенг.
Ой юзаси билан тўқнашув SpaceX томонидан 2025 йил январь ойида Америка–Япония қўшма ой қўниш модуллари учирилганидан кейин гравитация ва қуёш нурлари таъсири натижасида содир бўлди», — дейилади хабарда.
NASA маълумотига кўра, мазкур тўқнашув Ер учун ҳеч қандай хавф туғдирмайди. Айни пайтда астрономлар ҳосил бўлган бўлиши мумкин бўлган парчаларни ўрганиш учун тўқнашув жойини кузатишга тайёргарлик кўрмоқда.
Айрим олимлар эса коинот чиқиндилари тобора кўпайиб бораётгани ва бундай тўқнашувлар келажакда коинотни ўзлаштириш жараёнига салбий таъсир кўрсатиши мумкинлигидан хавотир билдирмоқда.
