Бухоро вилоятида йирик корхоналар фаолияти самарадорлиги ва солиқ тушумлари билан боғлиқ муаммолар танқидий муҳокама қилинди.
Қайд этилишича, вилоятида йиллик айланмаси 100 миллион сўмдан юқори бўлган 162 та корхона кетма-кет уч йил давомида фаолиятини зарар билан якунлаган. Шу сабабли мазкур корхоналар давлат бюджетига бир сўм ҳам фойда солиғи тўламаган.
Шунингдек, яна 1,5 мингта корхона қўшилган қиймат солиғини тўламасдан, фақат қўшилган қиймат солиғи бўйича чегирмалардан фойдаланиб келгани қайд этилди.
Мазкур ҳолатлар муносабати билан Бухоро вилояти ҳокимининг биринчи ўринбосари эгаллаб турган лавозимидан озод этилди.
Мутасаддиларга ҳудудда корхоналар фаолияти самарадорлигини ошириш, солиқ маъмуриятчилигини кучайтириш ҳамда бюджет тушумларини кўпайтириш бўйича таъсирчан чораларни амалга ошириш вазифаси қўйилди.
