Ўзбекистонда 2026/2027 ўқув йили учун олий таълим муассасалари ва профессионал таълим муассасаларига кириш имтиҳонларида иштирок этувчи абитуриентлар учун рухсатномалардан фойдаланиш имконияти яратилди.
Билим ва малакаларни баҳолаш агентлиги маълум қилишича, онлайн рўйхатдан ўтган абитуриентлар «Абитуриент рухсатномаси»ни олишлари мумкин. Ҳужжатни my.uzbmb.uz порталидаги шахсий кабинет орқали юклаб олиш мумкин. Бунинг учун ЖШШИР (ПИНФЛ), шунингдек паспорт серияси ва рақамини киритиш талаб этилади.
Идора эслатишича, имтиҳон куни абитуриентлар ўзлари билан паспорт ёки ID-картанинг аслини ҳамда чоп этилган ёки электрон шаклдаги рухсатномани олиб келишлари шарт.
Паспорт ёки ID-картанинг асли ўрнига нусхасини тақдим этган, шунингдек имтиҳон бошланишига кечиккан абитуриентлар имтиҳонга киритилмайди.
