Ўзбекистон миллий терма жамоаси ярим ҳимоячиси Жалолиддин Машарипов соғлиғи билан боғлиқ жиддий муаммоларга дуч келди ва 2026 йилги футбол бўйича Жаҳон чемпионати ўйинларини ўтказиб юбориши мумкин.
Ўзбекистон футболи мутасаддилари маълумотига кўра, футболчи бел соҳасидаги оғриқлар сабаб миллий жамоанинг сўнгги машғулотларида иштирок этмаган. Шунингдек, у Канада ва Нидерландия терма жамоаларига қарши ўртоқлик учрашувларини ҳам ўтказиб юборган.
Тиббий кўрик натижаларига кўра, футболчида умуртқа поғоналари орасидаги чурранинг қайта кучайиши аниқланган. Шу муносабат билан шифокорлар унга маълум муддат давомида ўйинларда қатнашмаслик ва оғир жисмоний юкламалардан воз кечишни тавсия қилган.
Терма жамоа тиббий штаби маълум қилишича, сўнгги ҳафталарда дори-дармонлар ва физиотерапия муолажалари туфайли Машариповнинг аҳволи яхшиланган. Бироқ кейинчалик оғриқлар яна қайталанган ва бу мутахассислар назоратини кучайтиришни талаб қилган.
Ҳозирда шифокорлар футболчининг соғлиғини доимий назорат қилиб бормоқда. Унинг тикланиш муддати ва бўлажак ўйинларда иштирок этиш имконияти бўйича якуний қарор қўшимча текширувлар натижасидан сўнг қабул қилинади.
Эслатиб ўтамиз, Ўзбекистон миллий терма жамоаси ўз тарихида илк бор футбол бўйича 2026 йилги Жаҳон чемпионати йўлланмасини қўлга киритган эди. Шу боис жамоа етакчиларидан бири ҳисобланган Машариповнинг эҳтимолий йўқотилиши терма жамоа учун жиддий йўқотиш бўлиши мумкин.
