Адлия вазирлиги томонидан «Андижон девзира оши» географик кўрсаткич сифатида давлат рўйхатидан ўтказилди. Бу қарор миллий таомнинг номи ва унинг анъанавий тайёрлаш технологиясини ҳуқуқий жиҳатдан муҳофаза қилишга хизмат қилади.
Андижон девзира оши асрлар давомида шаклланган ошпазлик анъаналари, ўзига хос тайёрланиш услуби ва бетакрор таъми билан ажралиб туради. Таомнинг асосий таркибий қисми бўлган девзира гуручи Фарғона водийсида етиштирилиб, қизғиш тусли, зич ва сифатли доналари билан машҳур ҳисобланади.
Географик кўрсаткич мақомининг берилиши маҳсулотнинг ўзига хос хусусиятларини сақлаб қолиш, сифат кафолатларини мустаҳкамлаш ҳамда унинг келиб чиқиш манбасини расман тасдиқлаш имконини яратади.
Шунингдек, мазкур мақом Андижон вилоятининг гастрономик салоҳиятини кенг тарғиб қилиш, миллий брендларни ривожлантириш, туризмни қўллаб-қувватлаш ва ўзбек миллий таомларини халқаро майдонда оммалаштиришда муҳим аҳамият касб этиши таъкидланмоқда.
Маълумот учун, географик кўрсаткич маҳсулотнинг муайян ҳудуд билан боғлиқлигини ҳамда унинг сифати ва обрўси айнан шу ҳудуднинг табиий ва ижтимоий омиллари билан чамбарчас боғлиқ эканини тасдиқловчи интеллектуал мулк объекти ҳисобланади.
