Париж шаҳрида Чемпионлар лигаси финали олдидан ва ўйин давомида мухлислар ҳамда полиция ўртасида тўқнашувлар содир бўлди. Ҳуқуқ-тартибот органлари томонидан бир қатор шахслар қўлга олинган.
Маълум қилинишича, ҳал қилувчи учрашувда Франциянинг ПСЖ ва Англиянинг «Арсенал» жамоалари ўзаро баҳс олиб борган. Учрашув атрофидаги тартибсизликлар давомида жами 20 нафар шахс ушланган бўлиб, уларнинг 10 нафари ҳибсга олинган. Қўлга олинганлардан пиротехника воситалари ҳам мусодара қилинган.
Шаҳарнинг айрим ҳудудларида вандализм ҳолатлари ҳам қайд этилди. Хусусан, Париж туманларидан бирида автобус бекатига зарар етказилган. ПСЖнинг уй стадиони ҳисобланган «Парк де Пренс» атрофида ҳам вазият кескинлашгани хабар қилинмоқда.
Тартибни тиклаш мақсадида полициянинг махсус бўлинмалари жалб қилиниб, оммани тарқатиш учун кўз ёш оқизувчи газ ва резина дубинкалардан фойдаланилган. Шунингдек, Парижнинг машҳур Елисей майдонларида ҳам кўз ёш оқизувчи газли гранаталар қўлланган.
Финал учрашуви муносабати билан шаҳарда хавфсизлик чоралари олдиндан кучайтирилган эди. Қатор савдо дўконлари иш вақтини қисқартириб, эртароқ ёпилди. Шаҳарнинг марказий кўчалари ва жамоат жойлари махсус тўсиқлар билан ҳимоя қилинди.
Триумфаль арка атрофидаги ҳудуд вақтинча ёпилиб, яқин атрофда автотранспорт ҳаракати чекланган. Шунингдек, ўнга яқин метро бекати хавфсизлик нуқтаи назаридан вақтинча фаолиятини тўхтатган.
Маҳаллий ҳокимият ва ҳуқуқ-тартибот органлари вазиятни назорат остига олганини маълум қилди. Парижда жамоат хавфсизлигини таъминлаш бўйича қўшимча чоралар кўрилмоқда.
