13 май куни Қозоғистон Республикаси делегацияси Тошкентда бўлиб ўтадиган «Хитой – Марказий Осиё – 2026» форумида иштирок этиш учун Ўзбекистон Республикасига келди. Қозоғистон томони вакиллари билан Ўзбекистон Республикаси Инсон ҳуқуқлари бўйича миллий маркази директори, академик Акмал Саидов учрашди.
Суҳбат давомида инсон ҳуқуқлари соҳасида икки томонлама ҳамкорликнинг устувор йўналишлари, шунингдек, ҳар икки мамлакатда амалга оширилаётган конституциявий ислоҳотлар муҳокама қилинди. Ўзбекистон томони Қозоғистонда амалга оширилган ўзгаришларни, жумладан давлат бошқаруви тизимини модернизация қилиш ва инсон ҳуқуқларини ҳимоя қилиш механизмларини кучайтиришни юқори баҳолади.
Таъкидланишича, 2023 йилда қабул қилинган Ўзбекистоннинг янгиланган Конституциясида инсон ҳуқуқларига бағишланган нормалар блоки сезиларли даражада кенгайтирилган. Хусусан, «Миранда қоидалари» кафолатлари ва «Хабеас корпус» институти кучайтирилган, шунингдек миллий инсон ҳуқуқларини ҳимоя қилиш институтларининг конституциявий мақоми мустаҳкамланган.
Қозоғистон делегацияси раҳбари, Қозоғистон ТИВнинг алоҳида топшириқлар бўйича элчиси Алуа Надиркулова минтақавий мулоқотни кучайтириш муҳимлигини таъкидлаб, бўлажак форумда кўтарилган мавзуларнинг долзарб эканини қайд этди.
Томонлар ҳамкорликни кенгайтириш истиқболларини ҳам муҳокама қилди, жумладан аёллар ҳуқуқларини ҳимоя қилиш бўйича қўшма форумлар ва тренинглар ўтказиш, шунингдек 2026 йилда бўлиб ўтадиган Бешинчи Самарқанд инсон ҳуқуқлари форумида Қозоғистон томонининг иштирок этиши масаласи кўриб чиқилди.
Учрашув якунларига кўра, Ўзбекистон ва Қозоғистон ўртасида инсон ҳуқуқлари соҳасидаги ҳамкорлик изчил мустаҳкамланиб бораётгани ва Марказий Осиёда ягона минтақавий ҳамкорлик маконини шакллантириш учун муҳим асос бўлиб хизмат қилаётгани қайд этилди.
