Тошкент халқаро аэропортида ўтказилган тезкор тадбир давомида хориждан олиб кирилган йирик миқдордаги синтетик наркотик модда тўхтатиб қолинди.
Маълум қилинишича, Давлат хавфсизлик хизмати ҳамда “Тошкент-Аэро” ихтисослаштирилган божхона комплекси ходимлари ҳамкорлигида ўтказилган тадбирда божхона назоратининг “яшил йўлак” йўналиши орқали ҳаракатланган икки нафар шахс текширувдан ўтказилган. Улардан бири Фарғона вилоятида яшовчи 1988 йилда туғилган фуқаро, иккинчиси эса 2006 йилда туғилган Россия Федерацияси фуқароси бўлган.
Текширув жараёнида уларнинг қўл юклари ва багажлари орасидан спорт озуқаси кўринишида қадоқланган икки дона елим идиш аниқланган. Экспертиза натижаларига кўра, ушбу идишларда жами 986 грамм “Альфа-ПВП” синтетик наркотик моддаси мавжудлиги маълум бўлган.
Тезкор тадбирнинг давомида Сергели туманидаги хуфия жойга қолдирилган гиёҳвандлик воситасини қабул қилиб олиш вақтида унинг буюртмачиси сифатида гумон қилинган 1996 йилда туғилган Тошкент шаҳри фуқароси ҳам қўлга олинган.
Ҳозирда ушбу ҳолат юзасидан жиноят иши қўзғатилган бўлиб, тергов ҳаракатлари олиб борилмоқда.
Мутахассислар фикрича, синтетик гиёҳвандлик воситаларининг ноқонуний айланмасига қарши курашни кучайтириш аҳоли, айниқса ёшлар хавфсизлигини таъминлашда муҳим аҳамият касб этмоқда.
