Тошкент шаҳрида Ижтимоий ҳимоя миллий агентлиги томонидан учинчи марта кенг кўламли “Инсон учун” фестивали ташкил этилди. Бир неча йил давомида мазкур лойиҳа оддий савдо ярмаркасидан инклюзивлик, бандлик ва ижтимоий қўллаб-қувватлаш масалаларига бағишланган йирик ижтимоий платформага айланди.
Фестиваль доирасида меҳнат ярмаркалари, касбий танловлар, таълим дастурлари ва очиқ мулоқотлар ўтказилмоқда. Бу йилги тадбирнинг асосий воқеаларидан бири эса Ўзбекистонда илк бор ташкил этилган Абилимпия миллий чемпионати бўлди.
Абилимпия — ногиронлиги бўлган шахсларнинг касбий кўникмаларини ривожлантириш ва уларнинг бандлигини қўллаб-қувватлашга қаратилган халқаро ҳаракат ҳисобланади. Чемпионат иштирокчилари турли соҳалардаги маҳоратларини намойиш этиб, иш берувчилар учун иқтидорли ва малакали мутахассислар билан танишиш имкониятини яратди.
Фестиваль доирасида инклюзив бандлик масаласига алоҳида эътибор қаратилди. Тадбирда ногиронлиги бўлган шахслар учун иш ўринлари яратаётган компаниялар ва тадбиркорлар иштирок этмоқда. Мутахассислар фикрича, бу каби ташаббуслар меҳнат бозорида тенг имкониятларни кенгайтиришга хизмат қилади.
Ижтимоий ҳимоя миллий агентлиги директорининг биринчи ўринбосари Шаҳноза Мирзиёева фестиваль доирасида ногиронлиги бўлган инсонлар учун нафақат қўллаб-қувватлаш, балки таълим олиш, ишлаш, ривожланиш ва жамият ҳаётида тўлиқ иштирок этиш учун шароит яратиш муҳим вазифа эканини таъкидлади.
Тадбир иштирокчиларига кўра, “Инсон учун” фестивали инклюзив жамиятни шакллантириш, ижтимоий фаолликни ошириш ва ногиронлиги бўлган шахсларнинг салоҳиятини намоён этиш учун муҳим майдонга айланиб бормоқда.
