Ўзбекистон қишлоқ хўжалиги бошқарув тизимида таркибий ўзгаришлар амалга оширилди. Ветеринария ва чорвачиликни ривожлантириш қўмитаси қайта ташкил этилиб, унинг негизида Қишлоқ хўжалиги вазирлиги таркибида Чорвачилик ва яйлов хўжалигини ривожлантириш агентлиги ташкил этилди.
Президент қарори билан янги агентлик директори этиб Ориф Бутаев тайинланди. Шу билан бирга, у Қишлоқ хўжалиги вазирининг ўринбосари лавозимини ҳам эгаллади.
Ориф Бутаев ушбу тайинловга қадар 2020 йилдан буён “Микрокредитбанк” бошқаруви раиси сифатида фаолият юритган. Ундан аввал “Ўзсаноатқурилишбанк” бошқаруви раиси биринчи ўринбосари лавозимида ишлаган. 2025 йилда “Содиқ хизматлари учун” медали билан тақдирланган.
Янги агентлик олдига Осиё тараққиёт банки иштирокида қиймати 63 миллион доллар бўлган йирик дастурни амалга ошириш вазифаси қўйилган. Лойиҳа доирасида яйловларни тўлиқ инвентаризация қилиш, инфратузилмани тиклаш, сув қудуқларини қазиш ва уруғ сепиш учун дронлардан фойдаланган ҳолда ўсимлик қопламини кенгайтириш режалаштирилган.
Шунингдек, аҳоли учун жамоат яйловларини ташкил этиш ҳамда мамлакат бўйлаб 200 та ихтисослашган маҳаллага ветеринария мутахассисларини жалб қилиш кўзда тутилган.
