8–13 май кунлари Ўзбекистон Туризм қўмитаси томонидан Покистон туризм соҳаси вакиллари делегациясининг мамлакатга ташрифи ташкил этилди.
Ташрифнинг асосий мақсади — Покистондан Ўзбекистонга туристлар оқимини ошириш ва икки давлат туроператорлари ўртасида тўғридан-тўғри алоқаларни йўлга қўйишдан иборат.
8 май куни Wyndham Garden Tashkent меҳмонхонасида B2B форматида бизнес учрашув бўлиб ўтди. Унда Покистоннинг 24 та етакчи туроператори ҳамда Ўзбекистоннинг 50 га яқин туристик компанияси вакиллари иштирок этди.
Томонлар туризм соҳасидаги ҳамкорликнинг бугунги ҳолати ва уни ривожлантириш истиқболларини муҳокама қилди. Музокаралар якунлари бўйича янги туристик пакетлар яратиш ва ҳамкорлик келишувларини имзолаш бўйича келишувларга эришилди.
Ташриф доирасида Покистон делегацияси Ўзбекистоннинг бошқа туристик шаҳарларига ҳам боради. У ерларда маҳаллий туризм соҳаси вакиллари билан учрашувлар ўтказилиши режалаштирилган.
