Навоий вилоятининг Зарафшон шаҳрида ҳуқуқни муҳофаза қилувчи органлар буюртма асосида содир этилиши режалаштирилган жиноятнинг олдини олди. Бу ҳақда вилоят ИИБ матбуот хизмати хабар берди.
Тергов маълумотларига кўра, можаро ёш оила ичида келиб чиққан. Келиннинг аммаси куёвни “жазолаш” мақсадида унга ҳужум уюштираётганини режалаштирган. Бунинг учун у 1992 ва 1994 йилларда туғилган икки таниши билан келишиб, уларга 40 миллион сўм ваъда қилган.
Ҳуқуқни муҳофаза қилувчи орган ходимлари тезкор тадбир ўтказиб, суиқасдни саҳналаштирган, махсус видеотасвир тайёрлаб, уни “буюртма” бажарилганини тасдиқлаш учун аёлга юборган.
Шундан сўнг аёл келишилган пулнинг бир қисми — 2 миллион 300 минг сўмни “ижрочилар”га ўтказган. У пулни бераётган вақтда ашёвий далиллар билан қўлга олинган.
Мазкур ҳолат юзасидан жиноят иши қўзғатилган. Айни пайтда тергов ҳаракатлари олиб борилмоқда.
