Фарғона вилоятида хотини ва вояга етмаган қизини ўлдиришда айбланган эркакка нисбатан суд ҳукми чиқарилди.
Фожеа ўтган йил ноябрь ойида Ўзбекистон туманида содир бўлган. Тергов маълумотларига кўра, эркак маст ҳолда қайнонасининг уйига келган, у ерда хотини фарзандлари билан яшарди. Аввалроқ аёл алимент ундириш бўйича судга мурожаат қилган ва суд қарорига кўра, эркак 15 суткага қамалган.
Озодликка чиққанидан сўнг, у алимент тўлашдан қочиш мақсадида жиноят содир этган. Жанжал давомида у хотинига бир неча бор пичоқ билан жароҳат етказган, сўнг икки ёшли қизига ҳам ошхона пичоғи билан зарба берган.
Қизалоқ воқеа жойида вафот этган, аёл эса шифохонага олиб кетилаётганида йўлда жон берган. Ҳодисадан сўнг эркак яшириниб кетган, аммо кўп ўтмай қўлга олинган.
Суд уни Жиноят кодексининг 97-моддаси 2-қисми «а, в, ж, и» бандлари бўйича айбдор деб топиб, 19 йилга озодликдан маҳрум қилди.
