Ўзбекистонда Reporters sans frontières томонидан эълон қилинган матбуот эркинлиги бўйича янги рейтингга кўра, мамлакат 147-ўринни эгаллади. Бу ўтган йилга нисбатан бир поғонага юқорилаганини англатади. Шу билан бирга, умумий балл 35,24 дан 34,95 гача пасайган.
Ташкилот маълумотларига кўра, сиёсат, ҳуқуқий муҳит, маданият ва жамият каби йўналишларда кўрсаткичлар ёмонлашган, иқтисодиёт ва хавфсизлик соҳаларида эса оз миқдорда ўсиш қайд этилган. Умуман олганда, мамлакатда ОАВ эркинлиги ҳолати «жуда мураккаб» деб баҳоланган.
Экспертлар таъкидлашича, 2016 йилда биринчи Президент Ислом Каримов вафот этганидан сўнг медиасоҳадаги вазият маълум даражада яхшиланган бўлса-да, бу ўзгаришлар тўлиқ эмас.
Минтақавий кесимда Шарқий Европа ва Марказий Осиё матбуот эркинлиги даражаси бўйича энг ноқулай ҳудудлардан бири бўлиб қолмоқда. Рейтингда Қирғизистон 146-ўринни, Қозоғистон эса 149-ўринни эгаллаган. Рўйхатнинг қуйи қисмида Беларусь (165-ўрин), Озарбайжон (171-ўрин), Россия (172-ўрин) ва Туркманистон (173-ўрин) жойлашган.
Рейтингда кетма-кет ўнинчи йил етакчиликни Норвегия сақлаб қолди. Иккинчи ўринни Нидерландия эгаллаган. Рўйхат охирида Хитой (178-ўрин), Шимолий Корея ва Эритрея қайд этилган. Илк бор жаҳон мамлакатларининг ярмидан ортиғида матбуот эркинлиги ҳолати «мураккаб» ёки «жуда мураккаб» деб баҳоланди.
Аввалроқ Ўзбекистон World Happiness Report 2026 глобал рейтингида энг бахтли давлатлар орасида 53-ўринни сақлаб қолгани хабар қилинган эди. Мамлакатда ҳаётдан қониқиш даражаси экспертлар томонидан 10 баллдан 6,283 баллга баҳоланган.
