Фарғона водийсида Қўқон, Наманган, Андижон ва Марғилон шаҳарларини ўзаро боғловчи янги электропоезд қатнови йўлга қўйилди. Лойиҳанинг ишга туширилиши муносабати билан Ўзбекистон Республикаси Президенти Шавкат Мирзиёев жамоатчилик вакиллари билан бирга ушбу йўналишдаги илк рейсда Қўқондан Марғилонгача сафар қилди.
Мазкур ташаббус давлат раҳбарининг 2025 йил 27 декабрда қабул қилинган темир йўл транспортида маҳаллий йўналишларда йўловчи ташиш ҳажмини оширишга қаратилган қарори ижроси доирасида амалга оширилди.
Янги 324 километрли темир йўл ҳалқаси аҳоли зич жойлашган водий ҳудудларини янада яқинлаштириш, транспорт қатновини яхшилаш ва аҳолига қулай ҳамда арзон хизмат кўрсатиш имконини яратади. Шу билан бирга, у тадбиркорлик ва туризм ривожи учун қўшимча имкониятлар очиши кутилмоқда.
Электропоезд Тошкент йўловчи вагонларини қуриш ва таъмирлаш заводида ишлаб чиқарилган бўлиб, олти вагондан иборат ва 586 ўринга эга. Поезд соатига 120 километргача тезликда ҳаракатлана олади.
Йўлкира 15 минг сўм этиб белгиланган. Мутахассислар фикрича, бу автомобиль транспортига нисбатан анча арзон ва қулай ҳисобланади. Кунлик 1,5 минг, йиллик эса қарийб 600 минг нафар йўловчига хизмат кўрсатиш имконияти ҳудуд иқтисодий фаоллигини оширишга хизмат қилади.
Вагонлар замонавий қулайликлар билан жиҳозланган. Жумладан, иқлим назорати тизими, кондиционерлар, бепул Wi-Fi ва гаджетлар учун USB портлар мавжуд. Ногиронлиги бўлган шахслар учун махсус кўтаргичлар, кенг жойлар ва мослаштирилган ҳожатхоналар назарда тутилган. Шунингдек, велосипедларни ташиш учун махсус маҳкамлагичлар ҳам ўрнатилган.
Хавфсизлик масалаларига ҳам алоҳида эътибор қаратилган. Вагонларда видеокузатув тизими ва зарба кучини камайтирувчи креш-технологиялар жорий этилган бўлиб, улар халқаро стандартларга мос келади.
Сафар давомида давлат раҳбари ҳудуд фаоллари билан учрашиб, водийда амалга оширилаётган ўзгаришлар юзасидан фикр алмашди.
