Ижтимоий тармоқларда Бўстонлиқ тумани “Янги ҳаёт” маҳалласи ҳудудида ноқонуний чиқиндихона юзага келгани акс этган видеолавҳа тарқалди. Мазкур ҳолат юзасидан масъул идоралар томонидан тезкор ўрганиш ишлари олиб борилди.
Чиқиндиларни бошқариш ва сirkуляр иқтисодиётни ривожлантириш агентлиги ишчи гуруҳи жойига чиққан ҳолда вазиятни атрофлича таҳлил қилди. Ўрганишлар натижасида чиқиндилар юридик ва жисмоний шахслар томонидан белгиланмаган жойларга ташланиши оқибатида тўпланиб қолгани аниқланди.
Маълум қилинишича, ушбу ҳудуд санитар тозалаш корхоналарининг режали хизмат кўрсатиш ишларига киритилмаган бўлса-да, вазиятни бартараф этиш бўйича зарур чоралар кўрилган.
Шу билан бирга, ҳудудда назоратни кучайтириш мақсадида замонавий кузатув камераларини ўрнатиш ишлари бошланган. Улар сутка давомида ишлаб, ноқонуний чиқинди ташлаш ҳолатларини аниқлаш ва уларнинг олдини олиш имконини беради.
Мутахассислар фикрича, бундай ҳолатлар экологик маданиятнинг етарли даражада шаклланмаганини кўрсатади. Шу боис атроф-муҳитни муҳофаза қилиш ва тозаликни сақлаш масаласига жамоатчилик эътиборини кучайтириш муҳим аҳамият касб этади.
