Тошкент шаҳрида диний-экстремистик жамоа фаолиятига чек қўйилди. Бу ҳақда Жиззах вилояти Ички ишлар бошқармаси матбуот хизмати маълум қилди.
Маълумотларга кўра, 2001 йилда туғилган, Жиззах вилояти Ғаллаорол туманида яшовчи ва Тошкентдаги олий таълим муассасаларидан бирида таҳсил олаётган талаба қўлга олинган. У 2002 йилда туғилган таниши билан бирга «Telegram» мессенжерида ёпиқ гуруҳ ташкил этиб, унда тақиқланган экстремистик материалларни тарқатиб келган.
Тергов давомида аниқланишича, ушбу шахслар халқаро террористик ташкилотлар таъсири остида бўлган ва уларнинг кўрсатмаларига асосан ҳаракат қилган. Улар Жиззах вилоятининг турли маҳаллаларида яшовчи 18 нафар фуқарони мазкур гуруҳ фаолиятига жалб этган.
Мазкур ҳолат юзасидан Ўзбекистон Республикаси Жиноят кодексининг «Диний экстремистик, сепаратистик, фундаменталистик ёки бошқа тақиқланган ташкилотларни тузиш, бошқариш ёки уларда иштирок этиш» моддаси 1-қисми билан жиноят иши қўзғатилган. Ташкилотчилар қамоққа олинган бўлиб, уларга 5 йилдан 15 йилгача озодликдан маҳрум этиш жазоси тайинланиши мумкин.
Шунингдек, гуруҳнинг яна 9 нафар аъзосига нисбатан маъмурий қамоқ жазоси қўлланилган. Қолган иштирокчилар билан профилактик суҳбатлар ўтказилиб, улар профилактик ҳисобга олинган.
