Ўзбекистонда 2026 йил 1 январдан бошлаб якка тартибдаги тадбиркорлар ҳамда ўзини ўзи банд қилган шахслар электрон тўловларни қабул қилишда махсус QR-кодлардан фойдаланиши шарт бўлади.
Янгиликка кўра, мижозларга тўловни ягона график код, яни QR-код орқали амалга ошириш имконияти яратилиши лозим. Ушбу QR-кодлар фақат тўлов ташкилотларининг расмий рақамли платформалари орқали шакллантирилиши талаб этилади.
Қонунчиликка мувофиқ, QR-код мавжуд эмаслиги бу назорат-касса техникаси ёки ҳисоб-китоб терминалларидан фойдаланмасликка тенг ҳолат сифатида баҳоланади.
Солиқ кодексининг 221-моддасига киритилган ўзгаришларга асосан, мазкур талабларга риоя этмаган тадбиркорларга 5 миллион сўм миқдорида жарима қўлланилади. Бошқа шахс номига расмийлаштирилган QR-кодлардан фойдаланиш эса 20 миллион сўм миқдорида жаримага сабаб бўлади.
Мазкур чоралар нақд пулсиз ҳисоб-китобларни кенгайтириш, тўлов интизомини мустаҳкамлаш ҳамда шаффофликни оширишга қаратилган.
