Ҳиндистонда поездларнинг ҳалокати оқибатида 280 дан ортиқ киши қурбон бўлди. Поезднинг рельсдан чиқиб кетишига электрон қулфлаш тизимининг ўзгариши сабаб бўлган. Бу ҳақда мамлакат темир йўллар, алоқа, электроника ва ахборот технологиялари вазири Ашвини Ваишнав маълум қилди.
“Биз ҳодиса сабабларини ва бунга жавобгар шахсларни аниқладик. Бу электрон қулфлашнинг ўзгариши туфайли содир бўлди”, — деди вазир.
Йўл ҳаракати хавфсизлиги тизимига кирувчи электрон қулфлаш тизимида нима сабабдан ўзгаришлар юз берганига вазирлик раҳбари аниқлик киритмади.
Ўтган ҳафта жума куни Одиша штатининг Баласоре шаҳри яқинида тезюрар поезднинг бир нечта вагонлари рельсдан чиқиб кетиб, қўшни йўлда кетаётган юк поездига бориб урилган. Шундан сўнг ағдарилиб кетган вагонлар билан қарама-қарши ҳолатда ҳаракатланиб келган йўловчи поезди тўқнашиб кетган. Камида 288 киши ҳалок бўлди. Одиша штатида мотам эълон қилинди, деб хабар беради mir24.tv.
