Си Цзинпин Хитой Халқ Республикаси раиси этиб қайта сайланди. У Хитой тарихида учинчи беш йиллик муддатга сайланган биринчи раис бўлди. Бу ҳақда Xinhua ахборот агентлиги хабар бермоқда. Умумхитой халқ вакиллари кенгаши депутатлари номзодни бир овоздан маъқуллаган.
Шунингдек, у Марказий ҳарбий кенгаш раиси лавозимига қайта сайланди. Хитой коммунистик патияси раҳбари Си Цзинпин 2012 йил ноябрь ойидан бери ўз лавозимини эгаллаб келмоқда ва 2017 йил октябрь ойида унинг номзоди иккинчи беш йиллик муддатга тасдиқланган. 2018 йилда мамлакат конституциясига ўзгартириш киритилиб, президентлик муддатлари сонига чеклов бекор қилинди.
Си Цзинпин номи ва унинг сиёсий ғоялари ўтган йили Хитой Коммунистик партияси низомига киритилган. Бу илгари фақатгина ХХР етакчилари – Мао Цзедун ва Ден Сяопинга берилган эди.Си Цзинпиннинг биринчи президентлик муддати Хитой давлат аппаратида коррупцияга қарши қаттиқ кураш олиб борилгани билан ажралиб турди. Беш йил давомида 100 дан ортиқ юқори мансабдор шахслар жавобгарликка тортилди. Уларнинг аксарияти мамлакат раҳбарининг ҳозирги ёки эҳтимолий рақибларидир.
Натижада Си Цзинпин ва унинг тарафдорлари Сиёсий бюро таркибини ўз хоҳишига кўра тўлиқ шакллантириш учун қўлларида етарлича куч тўплашди.Хитойда расман бир нечта сиёсий партиялар мавжуд. Бироқ Хитой Коммунистик партиясининг етакчилик роли мамлакат конституциясида алоҳида белгилаб берилган. Давлат ҳокимиятининг олий органи Умумхитой халқ вакиллари кенгаши ҳисобланади.
