Жорий йилнинг 16 апрель куни Россиянинг Саратов вилояти Дергачевский туманида ўзбекистонликлар иштирокида ЙТҲ рўй берди. Бу ҳақда Ўзбекистоннинг Қозон шаҳридаги Бош консулхонаси маълум қилди.
Қайд этилишича, ҳодиса соат 01:10 да вилоятнинг Тамбов-Пенза-Саратов-Пристанное-Ершов-Озинки трассасида содир бўлган. “Lada Largus” автомашинасида бўлган Ўзбекистон фуқаролари ва трассада турган, “Volvo” шатакчиси таркибидаги “Autogalantas” юк автоулови иштирокида йўл-транспорт ҳодисаси қайд этилган.
Оқибатда 1 нафар Ўзбекистон фуқароси — йўловчи, 1987 йилда туғилган К.Ф.З. воқеа жойида вафот этган. 5 нафар ўзбекистонлик (1968 йилда туғилган ҳайдовчи, шунингдек, йўловчилар — 2005 ва 1991 йилларда туғилган эркаклар, 1980 ва 2002 йилларда туғилган аёллар) турли жароҳатлар билан туман шифохонасига жойлаштирилган.
Давлат автоинспекциясининг Саратов вилояти бошқармаси тўқнашувдан сўнг енгил автомобиль ёниб кетганини очиқлади.
“Ҳолат Бош консулхона назоратида. Вафот этган фуқаронинг жасадини ватанга қайтариш ишлари бошланган, жабрланганларга тиббий муолажа кўрсатилмоқда”, — дейилади хабарда.
