1809 йилдан бошлаб, Қўқон хонлиги ихтиёрида бўлган ҳозирги Ангрен, Олмалиқ ва Оҳангарон шаҳарлари ҳамда Оҳангарон, Пискент, Бўка, Ўрта Чирчиқ ва Оққўрғон туманлари эгаллаган ҳудуд 1867 йилдан бошлаб Туркистон генерал губернаторлигининг Сирдарё области таркибидаги Қурама уездига айлантирилади, дейилади Тарих чорраҳасида телеграм каналида.
Маълум қилииншича, Қурама уездидаги иқтисодий-молиявий ва маъмурий-хўжалик тизимининг тарихи тўғрисидаги ишончли маълумотлар ЎзРФА Шарқшунослик институтининг қўлёзма фондида 18-инвентар рақами остида сақланаётган Хўжа Аҳрор вақфномасидан (Оҳангарон ерлари 1488 йилда Абусаид Мирзо фармони билан Хўжа Аҳрорга вақф сифатида инъом этилган-И.Ё.), Р.Муқминованинг “Қўқон хонлиги вақфномалари” ва Ҳ.Бобобековнинг “Қўқон тарихи” монографияларида, шунингдек, В.П.Наливкиннинг “Қўқон хонлигининг қисқача тарихи”, “Туркистон ўлкасидаги вақф ишларининг ҳолати”, А.П.Хорошхиннинг “Тошкентдан Қўқонгача”, Муҳаммад Солиҳ Тошкандийнинг “Тарихи жадидаи Тошканд” сингари тарихий ва мемуар асарларида, Т.Файзиевнинг “Ўзбек-қурамалар” сарлавҳали номзодлик диссертацияси ва бошқа манбаларда сақланган.
“Қурама” деган маъмурий ҳудуд рус тилидаги тарихий ҳужжатларда илк маротаба 1800 йилда Тошкент ҳокими Юнусхўжанинг таклифи билан тоғ-кон муҳандислари сифатида келган Т.Бурнашев ва М.Поспеловлар ҳисоботининг “Часть 2. О Ташкентском владении” қисмининг “Отделение 5. Какия сверх города Ташкента еще селении к оному принадлежат” бўлимида учрайди.
