Миллий статистика қўмитаси маълумотларига кўра, сентябрь ойида шакар нархи арзонлашган кам сонли маҳсулотлардан бири бўлди. Ой давомида унинг нархи ўртача 0,9 фоизга арзонлашди, йиллик ҳисобда эса ўсиш бор-йўғи 0,1 фоизни ташкил этди.
Шу билан бирга, асосий озиқ-овқат маҳсулотларининг аксариятида нархлар ошиши кузатилди. Битта ой ичида гуруч 1 фоизга, тухум 5,3 фоизга, суякли мол гўшти 1,7 фоизга, қўй гўшти 1,3 фоизга ва лаҳм мол гўшти 1,1 фоизга қимматлашди. Йиллик кўрсаткичда нархларнинг ўсиши янада сезиларли бўлди: қўй гўшти 19,8 фоизга, лаҳм мол гўшти 17,9 фоизга, суякли мол гўшти 16,2 фоизга, тухум эса 11,4 фоизга қимматлашган.
Мева-сабзавот бозоридаги динамика мавсумий омилларга боғлиқ бўлди. Сентябрда цитрус мевалар 12 фоизга, узум 5,7 фоизга, олма 2,4 фоизга арзонлашган бўлса, помидор 14,2 фоизга, бодринг 13,5 фоизга ва сабзи 12,4 фоизга кескин қимматлашди.
В. Новиков
