Тошкент вилояти ҳокимлиги маълумотига кўра, жорий йилнинг 3 октябридан эътиборан ҳудудда ичимлик суви ва канализация хизматлари нархи ошади. Аҳоли учун бир кубометр ичимлик суви тарифи 2 600 сўмдан 3 100 сўмга (19 фоизга), канализация хизмати эса 1 300 сўмдан 1 500 сўмга (15 фоизга) кўтарилади.
Тарифларнинг ўзгариши электр энергияси нархларининг ошиши ҳамда тармоқларни таъмирлаш ва модернизация қилиш зарурати билан изоҳланмоқда. Ҳозирда вилоятдаги 862 та сув иншоотидан 197 таси (23 фоизи) таъмирга муҳтож. Охирги беш йилда вилоятда марказлашган ичимлик суви билан таъминланиш даражаси 57 фоиздан 82 фоизга, канализация қамрови эса 19 фоиздан 23 фоизга етказилган. Келгуси беш йилда 7,8 триллион сўм эвазига 4,8 минг км сув ва 2,1 минг км канализация тармоқлари барпо этилиб, ичимлик суви қамровини 95 фоизга, канализация тизимини эса 45 фоизга етказиш режалаштирилган.
