Фарғона вилоятида янги туғилган ўғлини кредит қарзларини тўлаш мақсадида сотишга уринган ёш ота-онага нисбатан суд ҳукми чиқарилди.
Олий суд маълумотига кўра, улар 2024 йилда танишган ва ота-оналарининг расмий розилигисиз бирга яшай бошлаган. 2025 йил октябрь ойида эса уларнинг ўғли дунёга келган.
Эркакнинг иш жойи ўзгариши муносабати билан оила Фарғонага кўчиб ўтган. Шундан сўнг улар жиддий молиявий қийинчиликларга дуч келган. Иш материалларига кўра, турмуш ўртоқлар кредит қарзларини узиш мақсадида чақалоқни сотишга қарор қилган.
Суд мажлисида айбланувчи аёл ушбу қарорни турмуш ўртоғи билан биргаликда қабул қилганини тан олган. Унинг айтишича, қарзлар тўлангач, онаси билан Туркияга ишлаш учун бориб, уй-жой сотиб олиш учун маблағ жамғаришни режалаштирган.
Суд ҳар икки айбланувчини Ўзбекистон Республикаси Жиноят кодексининг 135-моддаси («Одам савдоси») бўйича айбдор деб топди. Уларнинг ҳар бирига 5 йил муддатга озодликдан маҳрум қилиш жазоси тайинланди.
