Жиззах шаҳридаги истироҳат боғларидан бирида жойлашган аттракционда юз берган носозлик оқибатида тўрт нафар фуқаро жароҳат олди.
Маълум қилинишича, ҳодиса 10 июнь куни соат 22:00 атрофида «Ўрда» экологик маданият ва дам олиш боғидаги «Қулаш минораси» аттракционида содир бўлган.
Аттракцион ишида кузатилган техник носозлик натижасида тўрт нафар шахс турли даражада жароҳатланган. Жабрланганлар шифохонага ётқизилиб, уларга тиббий ёрдам кўрсатилмоқда.
Қайд этилишича, мазкур аттракцион 2019 йилда ишлаб чиқарилган бўлиб, у охирги марта 2025 йил 5 ноябрь куни техник кўрикдан ўтказилган.
Ҳозирда ҳолат юзасидан текширув ишлари олиб борилмоқда. Мутахассислар носозлик сабаблари ва ҳодисанинг барча тафсилотларини ўрганмоқда.
Ҳодиса жойидан тасвирга олинган видеолар ижтимоий тармоқларда тарқалиб, кенг жамоатчилик муҳокамасига сабаб бўлди.
