Бош прокуратура ҳузуридаги департамент ходимлари томонидан Тошкент шаҳри ва Тошкент вилоятида кучли таъсир қилувчи дори воситаларининг ноқонуний муомаласи билан шуғулланган шахслар фаолиятига чек қўйилди.
Биринчи ҳолат Оҳангарон шаҳрида аниқланган. Муқаддам судланган фуқаро шартли харидорга 305 дона «Зардекс» таблеткасини сотаётган вақтида қўлга олинган. Тинтув жараёнида ундан қўшимча равишда яна 35 дона ушбу дори воситаси топилган.
Тергов давомида шартли харидор ҳам мазкур препаратларни ноқонуний тарқатишга алоқадор экани маълум бўлди. Унинг «Олтин Тепа» маҳалласидаги хонадони кўздан кечирилганда яна 178 дона «Зардекс» таблеткаси мусодара қилинган.
Яна бир тезкор тадбир Тошкент шаҳрининг Мирзо Улуғбек туманида ўтказилди. У ерда муқаддам судланган уч нафар фуқаро 84 дона «Регапен» препаратини 12,6 миллион сўмга сотган вақтида ушланган. Қўлга олиш жараёнида улардан яна 28 дона мазкур дори воситаси олиб қўйилган.
Тезкор тадбирлар давомида жами 630 га яқин дона кучли таъсир қилувчи дори воситалари мусодара қилинди.
Барча ҳолатлар юзасидан Ўзбекистон Республикаси Жиноят кодексининг 251-1-моддаси («Кучли таъсир қилувчи моддаларнинг ноқонуний муомаласи») билан жиноят ишлари қўзғатилган. Тергов ҳаракатлари давом этмоқда.
