Тошкент вилоятида янги қурилаётган бинода ёнғин содир бўлди. Ҳодиса Тошкент туманининг Келес аҳоли пунктидаги «Олмазор» маҳалласида қайд этилди.
Ўзбекистон Республикаси Фавқулодда вазиятлар вазирлиги матбуот хизмати маълум қилишича, ёнғин ҳақидаги хабар 23 май куни соат 13:39 да келиб тушган.
Ҳодиса жойига икки қутқарув бўлинмаси тезкор равишда йўналтирилиб, улар 13:45 да етиб келган. Ёнғин 13:48 да локаллаштирилган ва 13:54 да тўлиқ бартараф этилган.
Дастлабки маълумотларга кўра, ёнғин бинонинг цоколь қаватида жойлашган қурилиш чиқиндиларини қамраб олган. Ёнғин майдони тахминан 40 квадрат метрни ташкил этган.
Ҳозирда ёнғин келиб чиқиш сабаблари ва етказилган моддий зарар миқдори аниқланмоқда. Мавжуд маълумотларга кўра, жабрланганлар йўқ.
Аввалроқ шунга ўхшаш ҳодиса Бухоро вилоятида ҳам содир бўлган эди. Унда кўп қаватли уйлардан бирининг том қисмида ёнғин қайд этилган. Ўшанда ёнғин ўчирувчилар ёнғинни бир ярим соат ичида тўлиқ бартараф этган, жабрланганлар бўлмаган.
