Наманган вилоятида “Қорадори-2026” махсус операцияси доирасида гиёҳванд моддаларнинг ноқонуний айланмасига қарши йирик канал фош этилди. Ҳуқуқни муҳофаза қилувчи органлар 1,2 килограмм опийни мусодара қилди.
Операция 8 май куни тезкор-профилактик тадбирларнинг биринчи босқичи доирасида ўтказилди. Давлат хавфсизлик хизмати ходимлари ички ишлар ва божхона органлари вакиллари билан ҳамкорликда гиёҳванд моддалар савдоси билан шуғулланувчиларни аниқлаш бўйича қатор рейдлар ўтказди.
Чуст туманининг “Зарафшон” маҳалласида тезкор маълумот асосида Spark автомашинаси тўхтатилди. Автомобиль кўздан кечирилганда, холислар иштирокида умумий оғирлиги 1,2 килограмм бўлган опий моддаси аниқланди. Гиёҳванд модда ашёвий далил сифатида олиб қўйилди.
Мазкур ҳолат юзасидан Жиноят кодексининг 246-моддаси (“Контрабанда”) ва 273-моддаси (“Гиёҳвандлик воситаларининг йирик миқдордаги ноқонуний муомаласи”) бўйича жиноят иши қўзғатилди. Гумонланувчилар қамоққа олинган, тергов ҳаракатлари давом этмоқда.
Эслатиб ўтамиз, аввалроқ Андижон вилоятида гиёҳванд моддалар контрабандаси ва савдоси билан шуғулланган уюшган жиноий гуруҳ аъзоларига нисбатан суд ҳукми чиқарилган эди. Улар жиноятдаги ролига қараб 8 йилдан 11 йилгача озодликдан маҳрум этилган.
