Ўзбекистон ва Корея Республикаси таҳлил марказлари сунъий интеллект, рақамли трансформация ва барқарор ривожланиш соҳаларида амалий ечимларни муҳокама қилди.
IT Park Uzbekistan ҳудудида «Сунъий интеллект ва рақамлаштиришнинг таълим, энергетика ва ҳудудларни ривожлантиришдаги ўрни» мавзусида халқаро форум бўлиб ўтди. Унда Ўзбекистон ва Корея Республикасининг давлат органлари, таҳлил марказлари, олий таълим муассасалари ва халқаро ташкилотлар вакиллари иштирок этди.
Форум Иқтисодий тадқиқотлар ва ислоҳотлар маркази делегациясининг Корея Республикаси ва Японияга ташрифи доирасида эришилган келишувлар натижаси бўлди.
Тадбир ташкилотчилари сифатида Иқтисодий тадқиқотлар ва ислоҳотлар маркази (CERR) Осиё тараққиёт банки институти (ADBI), Сеул миллий университети ҳузуридаги Давлат бошқаруви глобал институти (GDI) ҳамда Тошкент ахборот технологиялари университети билан ҳамкорлик қилди.
Форум иштирокчиларини қутлар экан, Иқтисодий тадқиқотлар ва ислоҳотлар маркази директорининг ўринбосари Нозимжон Ортиқов глобал беқарорлик шароитида Ўзбекистон иқтисодиётининг барқарорлигини таъкидлади.
«Жаҳон иқтисодиётида сақланиб қолаётган ўзгарувчанлик шароитида Ўзбекистон ташқи шокларга нисбатан барқарорликни намоён этмоқда. Жорий йилнинг биринчи чораги якунларига кўра иқтисодий ўсиш 8,7 фоизни ташкил этди. Бу ижобий динамиканинг сақланаётганини ва ички иқтисодий фаоллик кенгаяётганини кўрсатади, бу эса инвестициялар жалб этиш, инновацияларни жорий этиш ва янги технологик йўналишларни ривожлантириш учун шароит яратади», — деди у.
Сеул миллий университети вице-президенти доктор Килкон Ко Ўзбекистон барқарор ривожланиш динамикасини намоён этаётганини ва сунъий интеллект, экологик барқарорлик ҳамда маъмурий ислоҳотлар соҳаларида Корея Республикаси билан ҳамкорликни кенгайтириш учун катта салоҳиятга эга эканини таъкидлади.
Унинг сўзларига кўра, технологик ўзгаришлар тезлашаётган шароитда мамлакатлар ўртасидаги ҳамкорлик амалий тус олмоқда: «Биргаликда ишлаб, биз нафақат академик билимларни, балки замонавий чақириқларга жавоб берадиган амалий ечимларни ҳам ярата оламиз».
Осиё тараққиёт банки институти декани ва бош директори Бамбанг Броджонегоро инсон капиталига инвестиция киритиш, юқори технологияли тармоқларни ривожлантириш ва глобал ишлаб чиқариш занжирларига интеграциялашувни барқарор иқтисодий ўсишнинг муҳим омиллари сифатида қайд этди.
Тадбирда Осиё тараққиёт банки институти, Сонгюнгван университети, Сеул миллий университети, шунингдек Корея электр энергетика корпорацияси экспертлари иштирок этди.
Ўзбекистон томонидан давлат органлари, экспертлар ҳамжамияти, соҳавий вазирликлар, энергетика компаниялари, IT Park Uzbekistan ва етакчи олий таълим муассасалари вакиллари қатнашди.
Форум доирасида сунъий интеллектни таълимга жорий этиш, камбағалликни қисқартириш учун рақамли ечимлардан фойдаланиш, ҳудудларни ривожлантириш, шунингдек халқаро тажриба асосида энергетика соҳасини модернизация қилиш бўйича тадқиқотлар тақдим этилди.
«Маҳаллабай» тизимига манзилли ижтимоий-иқтисодий ривожланиш инструменти сифатида алоҳида эътибор қаратилди. Иқтисодий тадқиқотлар ва ислоҳотлар маркази маълумотларига кўра, мамлакатда 9 мингдан ортиқ маҳалла мавжуд бўлиб, уларда 9 мингдан зиёд ҳоким ёрдамчилари ва ижтимоий ходимлар фаолият юритмоқда.
Қайд этилишича, рақамли платформа жорий этилиши натижасида уй хўжаликларини манзилли қўллаб-қувватлаш тизимига ўтишга эришилди. Ихтисослаштирилган маҳаллаларда ишлаб чиқариш 89 фоизга ошган, қарздорлик 84 фоизга камайган, 60 фоиздан ортиғи тўлиқ бандликка эришган.
Шунингдек, 37 та туманда жойлашган 903 та «оғир» маҳалла билан иш олиб борилмоқда, уларда кам таъминланган аҳоли улуши юқори.
Форум иштирокчилари «Маҳаллабай» ёндашуви ижтимоий сиёсатнинг янада манзилли моделига ўтишни намоён этаётганини ва унинг минтақадаги бошқа давлатларда ҳам жорий этиш имконияти мавжудлигини таъкидладилар.
Форум якунларига кўра таҳлил марказлари ва халқаро институтлар ўртасида тажриба алмашиш ва ҳамкорликни кенгайтириш бўйича устувор йўналишлар белгиланди.
