Тошкент шаҳрида Давлат хавфсизлик хизмати ходимлари Тошкент шаҳар Ички ишлар бош бошқармаси билан ҳамкорликда уй-жой коммунал соҳасидаги коррупцион схемани бартараф этиш бўйича операция ўтказди. Юнусобод туманида соҳавий идора мутахассиси ноқонуний мукофот олишда гумон қилиниб қўлга олинди.
Тергов маълумотларига кўра, мансабдор шахс бошқарув компанияси раҳбарига олти кўп қаватли уйни бир ташкилот балансидадан бошқасига ўтказишда ёрдам беришни ваъда қилган. Хизматнинг асосий қисми сифатида мулкдорлар томонидан имзоланган ҳужжатларни Mening uyim платформасидаги биллинг тизимида расман рўйхатдан ўтказиш кўзда тутилган.
Хизмат алоқалари орқали кўмак кўрсатиш эвазига гумонланувчи 2,2 минг АҚШ доллари талаб қилган. У маблағнинг бир қисми — 1,5 минг долларни олаётган пайтда қўлга олинган. Шу билан бирга, у қочишга уринган, аммо ҳуқуқни муҳофаза қилувчи органлар ходимлари томонидан тезкорлик билан ушланган.
Ҳодиса юзасидан жиноят иши қўзғатилган, тергов ҳаракатлари олиб борилмоқда. Шунингдек, идоралар фуқароларга бундай ҳуқуқбузарликлар ҳақида 1520 қисқа рақами орқали мурожаат қилиш мумкинлигини, тўлиқ махфийлик кафолатланишини эслатиб ўтди.
