АҚШ Давлат департаменти ноқонуний миграцияга кўмаклашганликда айбланаётган Ўзбекистоннинг икки компанияси раҳбарлари ва юқори лавозимли мансабдор шахсларига нисбатан виза чекловлари жорий этилганини эълон қилди.
Бу ҳақда Давлат департаменти матбуот котиби биринчи ўринбосари Томас Пиготт хабар берди.
Баёнотга кўра, чоралар визa хизматларини кўрсатувчи компаниялар вакилларига нисбатан қўлланилган. АҚШ томони маълумотларига кўра, ушбу компаниялар асосан АҚШга ноқонуний киришни режалаштирган хорижлик фуқароларга йўналтирилган туристик хизматларни онгли равишда кўрсатган.
Текширувлар давомида Ўзбекистондаги айрим шахслар хорижликларни, жумладан ноболиғларни, Марказий Америка мамлакатларидаги транзит нуқталарига етказишни мувофиқлаштиргани аниқланган. Кейинчалик мигрантларнинг бир қисми АҚШ чегарасини ноқонуний кесиб ўтишга уриниб қолган пайтда қўлга олинган.
«Қўшма Штатлар миллий хавфсизликка таҳдид ёки миграция қонунчилигини бузишга қаратилган уринишларни мутлақо қабул қилмайди. Давлат департаменти ноқонуний миграциядан фойда кўрувчи шахсларни жавобгарликка тортиш ва мигрантларни ноқонуний ўтказувчи тармоқларни қатъий тўхтатишга интилади», — дейилади пресс-релизда.
Шунингдек, баёнотда ноқонуний миграцияга кўмаклашувчи жиноий тармоқларга қарши курашда қўрсатилган ҳамкорлик учун Ўзбекистон ҳукуматига миннатдорлик билдирилган.
